A ! Lenn... http://alenn.nireblog.com Tue, 09 Feb 2010 19:50:30 +0100 A ! Lenn... http://files.nireblog.com/blogs/alenn/gravatar.gif http://alenn.nireblog.com http://nireblog.com Dremmoù Arrasate, Youenn Kervalan (2009) http://alenn.nireblog.com/post/2010/02/03/dremmou-arrasate-youenn-kervalan-2009 http://alenn.nireblog.com/post/2010/02/03/dremmou-arrasate-youenn-kervalan-2009 Dremmoù Arrasate Tremen a reer ur prantad plijus o lenn ar romant-se, ijinet ha savet mat eo bet. Lakaet eo Breizh e-tal da vro-Euskadi en doare ma vije an eil bro melezour eben. Dizoloiñ a reer an daou, neket evel touristed, met gant daoulagad ar re engouestlet e dazont sevenadur ha politikerezh o bro. Seblant gwirion zo war an traoù, anavezout a reer mat al lec'hioù, anvioù tud 'zo... ma ne zesker ket kalz tra diwar-benn Breizh ez eus bet ur bern da rastellat, evidon, diwar-benn bro-Euskadi n'anavezen ket a-raok. Un daolenn vat a ra eus fin ar bloavezhioù 90. Soñjet 'm eus meur a wezh e c'hellfe bezañ dedennusoc'h evit tud yaouank eget evit tud gour koulskoude, o vezañ ma vez kinniget euskariz "marvet evit ar vro" evel harozed, n'eus preder ebet, koulz lavaret, war an abegoù a gement-se ha war ster an emgannoù feuls : dre se em eus kavet un tammig eeun ar soñjoù.
Ne ziskroger ket ur wezh kroget gant al lennadenn ha kavet 'n eus din e flistre ar brezhoneg en un doare aes dindan pluenn ar skrivagner : gwezh ebet ne harzer dirak ur ger re ziaes pe un droienn dinatur, chom a ra ar spered gant an dezrevell atav, pezh zo dreist. Souezhet bras on bet gant lusk ar skrid koulskoude, dezrevellet kentoc'h eget romantaet : mont a ra a-dizh-bras penn-da-benn, lonket e vez ar mizioù hag ar c'hilometradoù hep paouez da vat e lec'h pe lec'h, ha gant se, e chom a-ziavaez temz-spered an tudennoù un tamm.
Evit ur romant kentañ eo un taol kaer memestra !

Comments

]]> Wed, 03 Feb 2010 10:36:18 +0100 Ar roc'h, Yann Fulub Dupuy (2009) http://alenn.nireblog.com/post/2010/02/01/ar-roch-yann-fulub-dupuy-2009 http://alenn.nireblog.com/post/2010/02/01/ar-roch-yann-fulub-dupuy-2009 Ar roc'h
Ne oan ket gwall laouen o prenañ ul levr divyezhek, reiñ a reont din ar santimant da foeltrañ an hanter eus ar priz :-( ...met gwir eo ne goust ket re ger levrioù an ti-embann-mañ daoust ma vijent graet mat ha plijus da lenn a-fed neuz. Laouen on bet o c'hellout implijout an tu galleg evit sklaeraat pe wiriañ un toullad gerioù ivez.
Plijet bras on bet gant an tu brezhoneg : an danevelloù, berr tre a-wezhioù, 'vez diazezet war ur soñj mat bep tro, hag e vezer souezhet alies gant ar fin. Dedennet on bet dreist-holl gant an erotelezh a gaver e meur a zanevell ha n'eo ket ken paot se e brezhoneg ! Gouest eo da gas c'hoant, d'am soñj, da gement hini. Brav eo ar senennoù ha skrivet mat. Ar pezh zo diaesoc'h da rannañ, war ma meno, eo ar santadoù e-keñver plas an heñvelreviaded er gevredigezh, an diaes ma vez en em seveniñ pa vezer eus tu ar bihanniver. N'eus kaoz el levr-mañ nemet eus se koulz lavaret. Hag amañ emañ talvoudegezh an danevelloù-se, just a-walc'h, reiñ a reont tu d'al lenner da rannañ an dibarded-se gant harozed an danevelloù amzer ul lennadenn, d'an nebeutañ.
An danevell gentañ, Ar preizher, n'emañ ket 'barzh ar memes lusk : ur seurt digoradur eo d'al levr, ur prederig fentus war ar skrivañ. Elena 'm eus kavet iskis, daoust ma kav din bezañ komprenet : boazet on el levrioù da lenn gwenn war zu an diskoulm, aze e chom damlavaret. Dre zibab moarvat met santet 'meus kentoc'h ur gwander a-fed skritur (me gav din e tlefer gellout lenn / kompren un danevell bennak hep anavezout buhez ar skrivagner a-hed hag a-dreuz). Mat em eus kavet e meur a zanevell gellout ergerzhout hentoù karantez disheñvel : dre ar sell, dre an tec'h... N'eo ket re eeun denelezh an tudennoù, hag en se e tostaont ouzh an dud gwir, e roont d'en em sonjal don. Re alies e vez eeun an tudennoù betek re el lennegezh.
Souezhet on bet gant ton dispi danevelloù 'zo, Ar roc'h paneveken. Evel pa vije en em seveniñ kement ha mervel. Soñjal a ra din eo marteze peogwir int skridoù kozh ? met o vezañ na oa deiziad ebet war an danevelloù, n'heller ket gouzout...
Ur gerig bennak diwar-benn ar galleg da echuiñ. Skridoù Yann-Fulub Dupuy zo e-touez ar re vravañ a anavezan e brezhoneg, hag aze ne santer ket int bet troet. Pinvidik ha kizidik, resis ha soutil int. Koulskoude, ne blij ket tamm ebet e c'halleg din, daoust ma vijen boaz da lenn kalz e galleg ha ma karfen ar yezh (va yezh-vammm...) ivez. Labouret eo betek re, gant gerioù dibabet pizh ha troiennoù blaz ar c'hozh warno un tamm. Kavout a ra din e son evel ar skridoù loreet gant an "académie française". Dijaojañ a ra dreist-holl ouzh an divizoù. Ha posubl eo e sellfe e vrezhoneg war-raok, hag e c'halleg war-gil ? sur a-walc'h e tenn ouzh istor ar yezhoù hag ouzh o oad hag o skiant-prenet evel yezhoù skrivet... Ar yezh, en danevelloù-mañ, a cheñch penn-da-benn an doare da zegemer ar skrid.

Comments

]]> Mon, 01 Feb 2010 09:33:39 +0100 Kredu min, Sinjorino !, Cezaro Rossetti, bro-Saoz (1950) http://alenn.nireblog.com/post/2010/01/28/kredu-min-sinjorino-cezaro-rossetti-bro-saoz-1950 http://alenn.nireblog.com/post/2010/01/28/kredu-min-sinjorino-cezaro-rossetti-bro-saoz-1950 Kredu min
Skrivet eo bet al levr-mañ war-eeun en esperanteg gant un den a-orin eus bro-Suis hag a oa o chom e bro-Saoz. Hennezh en doa desket esperanteg e 1928, ar pezh a gont tamm-pe-damm en e "romant". E gwirionez, zoken m'eo kinniget evel ur romant, n'eo ket unan, o vezañ ma kont en un doare spis ul lodenn bennak eus buhez ar skrivagner. Savet eo tro-dro d'e labour a varc'hadour-red, a zor da zor pe e foarioù.
Souezhet on bet da gentañ gant lusk trankil ar skrid, displeget e vez kement tra gant forzh munudoù ha ne c'hoarvez ket ur mor a draoù. En em voazañ a reer avat ha bourrus e teu da lenn. Nebeut anavezet eo ar bed-se ha n'eo nemet ral a wezh e skriv seurt tud o buhezioù (daoust m'hor bije unan e brezhoneg d'an nebeutañ, hini Loeiz ar Floc'h "plakoù"...). Tro en deus bet Rossetti (alias Vik war e labour) d'en em gavout gant lamponed a bep seurt, tud livet kaer, farsus, iskis... lavarout a ra koulskoude en em gave mat en o zouez hag e veze kalz a entent hag a sikour etrezo peurliesañ. Eñ ne oa ket eus ar metoù-se koulskoude, un dibab eo eus e berzh. Souezhus eo e zemz-spered, mennet kaer, divezh ha bourjiner. Anat eo e youl, ne vez ket digalonekaet james, atav e klask diluziañ e gudennoù hag e teu a-benn. N'en doa ket aon, da skouer, da guitaat ul labour mat ha paeet mat gant ar soñj da gaout unan gwelloc'h, da gaout muioc'h a frankiz pe da c'hellout bezañ war e gont dezhañ e-unan : div wezh e c'hoarvez d'an nebeutañ hag en em gavout a ra gwall enket gwezhioù'zo, e kreiz enkadennoù ekonomikel bras. Koulskoude ne zibab ket an hent aesañ.
Ponner 'm eus kavet lusk ar skrid a-wezhioù : gant ar pezh a zispleg e c'heller divinout atav ar pezh a c'hoarvezo nebeut war-lerc'h, n'eo ket soutil-soutil ar skritur. Koulskoude eo skrivet mat, kempenn ha kempouez, mont a ra hebioù da veur a dech-skrivañ fall eta. Soursial a ra eus son ar yezh, o c'hoari gant ar gerioù meur a wezh, hag o kinnig titloù lipet d'e bennadoù. Alies vez mousc'hoarzhet pe c'hoarzhet, n'eo ket gant ar skritur, met gant an degouezhioù iskis ha skodegus en em gav an tudennoù rouestlet enno. 'Meus aon eo ul levr pouezus el lennegezh esperanteg, marteze dre m'emañ e-touez ar re gentañ o vezañ bet skrivet er yezh-se war-eeun (ne oa nemet tregont bloaz bennak ar yezh d'ar c'houlz-se), marteze a-walc'h en abeg d'e devder ivez, pa ya ouzhpenn 250 pajenn d'ober anezhañ. Troet eo bet en un nebeut yezhoù all, en o zouez ar saozneg, ket ar galleg avat.

Moien 'zo da bellgargañ al levr amañ : pezh 'moa graet... mankout a ra ur bajenn pe ziv, met n'eo ket sañsubl.

Comments

]]> Thu, 28 Jan 2010 02:35:54 +0100 Buhez ha fent, Hervé Lossec, 2009 http://alenn.nireblog.com/post/2010/01/12/buhez-ha-fent-herve-lossec-2009 http://alenn.nireblog.com/post/2010/01/12/buhez-ha-fent-herve-lossec-2009 Buhez ha fent
Kavout a ran al levr-se ken paour a-fed danvez ha m'eo pinvidik a-fed brezhoneg. Plijet on bet gant ar pennadoù tennet eus buhezioù memestra : eñvorennoù eus ar Goañv 63, Sebastopol, Mamm-gozh, Redeg bro. Ne blij ket din tamm ebet spered ar c'hontadennoù mod Dastum : santet e vez mat amañ, ha kontet eo pennadoù 'zo muioc'h eget skrivet. Soñjal a ra din eo dre ma n'em eus ket ar memes doare fent hag ar skrivagner. Ne lavaran ket eo ul levr fall, met n'eo ket diouzhin. Un afer rummad oad moarvat !

Comments

]]> Tue, 12 Jan 2010 09:40:46 +0100 La philosophie pour les nuls, Christian Godin, Frañs (2006) http://alenn.nireblog.com/post/2010/01/11/la-philosophie-pour-les-nuls-christian-godin-frans-2006 http://alenn.nireblog.com/post/2010/01/11/la-philosophie-pour-les-nuls-christian-godin-frans-2006 La philosophie pour les nuls"Da lakaat etre daouarn an holl" a c'heller lenn war ar golo. Ur pezh mell gaou : ar vugale, ar gozhidi, ar maouezed gwan o do poan o lenn anezhañ gant ar ponner m'eo : 1025 g ! ret bezañ motivet mat ! Grrr...

En abeg da se em eus tremenet kalz a amzer o lenn anezhañ, diouzh an noz hepken pa ne oan ket evit e zougen d'am heul e pep lec'h.
Ul levr talvoudus eo bet evidon pa n'anavezen ket kalz tra war ar sujed. Ur seurt Istor eus ar filozofiezh eo. Anat eo en deus klasket an oberer bezañ eeun, met ar pezh a gomz diwar e benn n'eo ket, ha chomet on nec'het a-wezhioù o klask heuliañ hentoù soñjoù tud 'zo ! Souezhet on bet alies, gant mennozhioù Sartre da skouer, n'eo ket e mod-se e ijinen anezho goude bezañ bet lennet un nebeut levrioù lennegel gantañ en va yaouankiz (La nausée ha Huis-clos, a soñjan), emichañs n'em boa intentet netra d'ar mare-se. Iskis eo peogwir e pegen a-wezhioù ouzh un arguzenn bennak hag nebeut goude ouzh unan kontrol. Ur skiant gwall luziet eo ar prederouriezh a gav din, ha n'eo ket al levr-mañ n'eus troet va soñj. Diamen e kaven traoù 'zo ivez.
Spered an dastumad eo farsal, skrivañ war un ton skañv : hep se n'em bije ket gellet mont betek fin moarvat. Koulskoude n'on ket bet plijet re gant fent ar skrivagner, ur fent gros, dindan ar gouriz alies, re nebeut lennegel en ur mod. E stil ivez a gaven amsklaer gwezhioù 'zo, ret lenn meur a wezh lod eus ar frazennoù. Ur ster o doa bewezh, met pas diouzh ar c'hentañ sell.
Mat eo teurel ur sell ledan war an danvez. Hogen n'eo ket a-walc'h lenn ur wezh al levr-se evit kompren ar prederouriezh : boued zo e-barzh, met diaes da ziazezañ. Me soñj din e vije da lenn meur a wezh a-raok tremen da draoù luzietoc'h war sujedoù pisoc'h.

Comments

]]> Mon, 11 Jan 2010 09:30:49 +0100 Kest, Kristian Ar Bras (2009) http://alenn.nireblog.com/post/2009/12/15/kest-kristian-ar-bras-2009 http://alenn.nireblog.com/post/2009/12/15/kest-kristian-ar-bras-2009 KestKest zo ur romant ne c'houzañv ket gant ar ment rediet evit oberennoù Priz ar Yaouankiz : klok eo, skrivet mat, ne santer redi ebet ennañ nemet hini diabarzh ar skrivagner 'n eus c'hoant da rannañ un dra bennak a zoug ennañ. A-fed steuenn emañ pep tra war ar pevare pajenn golo : ul lisead a ziskoach sekredoù familh bet kuzhet mort outañ betek-henn, traoù stag ouzh ar brezel. Mont a ra da vBerlin da glask mont e darempred gant tud eus e familh evit gouzout ar wirionez. Dont a ra a-benn da gavout ar pezh a glask, daoust ma ne vije ket gwall vrav a-wezhioù. Ne chomer ket gant an heug, ar c'heuz pe ar fulor : pezh a vez roet deomp da dañva eus Berlin, bravaet gant istor karantez an haroz du-hont, zo dreist. Santout a reer kalz a zoujañs hag a garantez evit an alamaned el levr-mañ. Ar fed en dije lakaet Erwan amzer-dremenet e familh er gouloù a zisamm anezhañ a-benn kregiñ gant ur vuhez all, hag a zigor dorioù, pontoù etre bro-C'hall ha bro-Alamagn evitañ. Goude e chomadenn e bro-Alamagn e taol ivez ur sell disheñvel war e vBreizh genidik.
Estreget evit ar re yaouank eo mat al levr : n'eo ket unan re eeun, meret gant re a vel. Kinnig a ra peadra da gompren gwelloc'h ar brezel hag an dud o deus kemeret perzh ennañ, tu pe du. Lakaet e vez sklaer ne oa ket unvan an alamaned, pas muioc'h eget ar vretoned ! Souezhet on bet un tamm gant ar pezh a dremen e penn Erwan pa ya da zivizout gant e eontr : re ziwezhat eo evit en em veñjiñ, a gav din, ha dreist-holl e oa bet tu da gompren a-raok ne oa ket bet mestr war e blanedenn, betek ur serten poent... met moarvat e vo komprenet gwelloc'h e emzalc'h gant tud yaouank.
A-hend-all m'eus merzet eo sklaer ar senennoù karantez : brav ha doujus, n'int na niverus na kammlec'hiet, met sklaer, pezh n'eo ket diouzh ar c'hiz el levrioù evit ar yaouankiz (niveruz, a gredan) a lennan e galleg ha troet diwar yezhoù all. Ne lavaran ket e vije fall, met soñjal a ra din e c'hellfe bugale 'zo bezañ lakaet diaes, o vezañ m'eo al levr da vezañ studiet en ur framm skol.

Comments

]]> Tue, 15 Dec 2009 21:42:18 +0100 War sikour Eleonor, Yann-Fañch Jacq (2009) http://alenn.nireblog.com/post/2009/12/14/war-sikour-eleonor-yann-fanch-jacq-2009 http://alenn.nireblog.com/post/2009/12/14/war-sikour-eleonor-yann-fanch-jacq-2009 War sikour Eleonor

Sed aze ur romantig lipet gant un istor vat, ur yezh aes tre ha yaouank (ne blijo ket d'an holl marteze, met an hini a gaoz ar skolajidi divyezhek eo forzh penaos). Ober 'zo forzh pegement, pa zapper eus ul live-c'hoari d'egile. Kempouezhet eo gant un istorig karantez skañv. N'eo ket hewel, gwell a se, n'emaomp ket ken gant lennegezh moral an XIXvet kantved, met soñjal a ra din e c'hell lakaat ar re yaouank d'en em soñjal diwar-benn ar feulster a blij dezho implijout en o c'hoarioù war urzhiataer. Deuet eo brav gant Yann-Fañch Jacq al levr-mañ, kinniget da lenn d'ar skolajidi 6vet ha 5vet klas evit Priz ar Yaouankiz 2010. Unan eus e levrioù gwellañ eo er rummad-se hervezon.

Comments

]]> Mon, 14 Dec 2009 14:29:47 +0100 Lunar park, Bret Easton Ellis, Amerika (2005) http://alenn.nireblog.com/post/2009/12/13/lunar-park-bret-easton-ellis-amerika-2005 http://alenn.nireblog.com/post/2009/12/13/lunar-park-bret-easton-ellis-amerika-2005 Lunar Park Lure a-walc'h em boa o kregiñ gant ar romant-mañ o vezañ m'ez eus warnañ an etikedenn "emfaltazi", ur ger hag a zigor an nor da skridoù paour a-fed ijin peurliesañ. Ne zispege ket ar santimant-se diouzhin e-pad ar c'hentañ pennad, 56 pajenn ennañ : dedennus e oa o vezañ ma venege e levrioù kent, met ne welen takenn ebet a faltazi. Pezh a ziskouez e oan dare da lonkañ ar bidennoù a vije servijet din war-lerc'h...
Aon 'moa e vije re a feulster ivez.
Faziet 'oan war gement tra. Ul levr dreist eo Lunar Park ha kilhet e vezer gantañ dindan nebeut a bajennoù. Fiskal e oa gedal ar menegoù niverus graet d'e romantoù all hag ar pezh a ouezer diwar e benn dija (e vignoniezh gant Donna Tartt...). Plijus gwelet penaos e tispleg American Psycho pe Moins que Zéro gant sirius ur skrivagner en ur pennad-kaoz... Displegadennoù a c'heller degemer pe argas : n'eo ket Lunar Park ur gwir buhez skrid ! Just ur romant, o loc'hañ eus fedoù gwir evit lod, faos evit lod all.
N'eo ket ken feuls ar romant-mañ eget ar re all 'moa lennet gantañ. Priziet 'm eus ar suspens, en deus lakaet ac'hanon da soñjal e-barzh levr Stephen King Simetierre meur a wezh. Met ouzhpenn ul levr suspens eo evel just ! Bet eo oc'h ergerzhout tachennoù n'en doa ket pleustret warno betek-henn : ar familh, ar vugale, ar fed da vezañ kiriek dre vras, da glask sevel da vat ur vuhez "normaloc'h" eget e hini kent...
Pezh a blij din e romantoù Bret Easton Ellis eo an doare m'en deus da leuskel al lenner etre daou, krediñ pe chom hep ober, ijinañ en un doare divoutin ar pezh a c'hoarvez d'ar bugel dianket ... Gouzout a ra echuiñ ul levr, ober ur pennad-klozañ a-feson, hag e ra, met chom a ra atav traoù eo d'al lenner da ijinañ. Ha peogwir ne zeu ket a-benn d'ober e soñj gant ar geusteurenn zo bet pasket dezhañ, e chom e romantoù d'ober o hent en e benn pell goude m'en deus o lennet.
Daoust ma komzfe eus traoù saotret, faoset, drammet, diaoulet ha me 'oar e skriv en un doare barzhoniek kenañ hag alies e chomer a-sav da saouriñ troienn pe droienn. Ur mestr eo war an niveridigezh, dreist pep tra.
Sed aze ur skrivagner ne blijfe ket e gompagnunez din, ha koulskoude emañ e levrioù e-touez ar re wellañ a anavezan ! Ur gwir arzour eo.

Comments

]]> Sun, 13 Dec 2009 15:41:05 +0100 Ar c'hraken, Jakez-Erwan Mouton (2009) http://alenn.nireblog.com/post/2009/12/11/ar-chraken-jakez-erwan-mouton-2009 http://alenn.nireblog.com/post/2009/12/11/ar-chraken-jakez-erwan-mouton-2009 Ar c'hraken N'eo ket nevez an tem, met plijus e vez atav lenn istorioù morviled hag adkavout roudoù Atlantiz. Dre vras eo deuet brav gant Jakez-Erwan Mouton ur wezh ouzhpenn, daoust ma kavfe din eo lipetoc'h ar penn kentañ eget ar fin e-keñver ar mor a draoù a oa da ginnig d'ar mare-se. Perak n'on ket kendrec'het penn-da-benn neuze, perak e kav din eo ul levr mat ha n'eo ket unan dispar ? Emichañs e teu eus ar ment, re voan e-keñver ar vouedenn oa er sujed, met ivez eus an doare m'eo tretet an haroz. An den nemetañ a reomp anaoudegezh gantañ tamm-pe-damm eo Nillsens, ha chom a ra diwar-c'horre.
Ar santimant em eus eo bezañ lennet un tamm senario dedennus-tre ha n'eo ket bet diorroet ennañ tu denel an tudennoù : gant se eo diaes bezañ lod en istor. Skrivet eo en ur yezh plijus ha pinvidik hep bezañ re ziaes, ha plijus eo ivez gellout fiziañ er skrivagner evit pezh a sell ouzh an deskrivadurioù istorel. Kavet em eus mat tre ar pennad-klozañ o lec'hiañ mat pep tudenn, al lenner zoken : stek a zo.
Ul levr brav e gwenn-ha-du eo en ur mod : ne vank nemet un nebeut trivliadennoù d'e livañ.

Comments

]]> Fri, 11 Dec 2009 08:44:39 +0100 Maen Rannou, Yann Gerven (2009) http://alenn.nireblog.com/post/2009/12/10/maen-rannou-yann-gerven-2009 http://alenn.nireblog.com/post/2009/12/10/maen-rannou-yann-gerven-2009 Maen RannouSed aze romant diwezhañ ar rummad teir levrenn evit ar yaouankiz Fulennoù war skubellennoù. Poent e oa, d'am soñj ! aet an awen da hesk gant fin an eil... ar pezh hon eus amañ eo div pe deir istorig distag peget an eil ouzh eben evel ma teu e teu, gant neud gros peurliesañ 'n eus lakaet ac'hanon da soñjal e dilamadennoù heuliadoù tele.
Evit ar yezh n'omp ket laeret : brav eo atav, naturel an divizoù daoust ma vije dreistnaturel ar c'henarroud. N'eo ket gwall zedennus, met ne varver ket gant an enoe memestra, ha lennet 'vez buan.
Evit an trilogiezh a-bezh, n'eus ket kalz a ster enni, kavout a ran un tammig flaner an dreveziñ sorserien mod Harry Potter farsus hag ar pezh a c'hoarvez e festival an Erer Kozh. Dizingal kenañ eo al lusk hag an interest a c'heller dougen d'an istor. Techet e oan ivez da veskañ an tudennoù peogwir int niverus-mat hag e komzont holl memes mod. Lakaomp n'eo ket da renkañ e-touez pennoberennoù Yann Gerven !

Comments

]]> Thu, 10 Dec 2009 13:33:45 +0100 La loi de nos pères, Scott Turow, Amerika (1996) http://alenn.nireblog.com/post/2009/12/04/la-loi-de-nos-peres-scott-turow-amerika-1996 http://alenn.nireblog.com/post/2009/12/04/la-loi-de-nos-peres-scott-turow-amerika-1996 La loi de nos pères
N'hellan ket lavaret em bije bet plijadur a-benn kaer en ur lenn al levr-se : kemplezh eo an ereadurezh anezhañ dre m'ez eus un toullad brav a dudennoù pouezus, ha n'eo ket ar yezh hini ur skrivagner meur : daoust ma ne vije netra da rebech outi a-fed stumm, ne vezer ket douget gant ar gerioù ne z'eont ket dreist an itrik. Ouzhpenn-se oan displijet a-walc'h gant stumm ar romant, o treiñ kazimant penn-da-benn tro-dro d'ur prosez, hag a lakae ac'hanon da soñjal e heuliadoù skinwel marc'had-mat 'zo.
Ur wezh lakaet an traoù e plas, bet o kenvevañ buhez bet ur bern tudennoù en o yaouankiz, anavezet gwelloc'h an hiniennoù, eo deuet da vezañ dedennusoc'h-dedennusañ. N'eo ket barzh ar romantour met tennañ a ra mat e spilhed evit pezh a sell ouzh gwriat buhez an dud etrezo, tud disheñvel mat an eil re ouzh ar re all a-fed liv kroc'hen, relijion, metoù. Sikour a ra seurt lennadenn da gompren gwelloc'h istor ar Stadoù Unanet, ar pezh a vez anatoc'h er fin, en ur seurt a hir a bennad-klozañ renet mat-tre hag a ziskoulm mat pep goulenn bet savet kent en ur zigeriñ war-zu dremmwelioù all. Kompren a reer mat an titl er pajennadoù diwezhañ ivez, ar re bouezusañ ha fromusañ forzh penaos (met ne vije ket bet anezho hep ar penn kentañ !) Ur sammad dedennus eo eta, a dalv ar boan kiañ un tamm war an deroù anezhañ evit tañva peurglokted e fin.

Comments

]]> Fri, 04 Dec 2009 08:48:28 +0100 Je suis Hodder, Bjarne Reuter, Danmark (1998) http://alenn.nireblog.com/post/2009/12/01/je-suis-hodder-bjarne-reuter-danmark-1998 http://alenn.nireblog.com/post/2009/12/01/je-suis-hodder-bjarne-reuter-danmark-1998 Je suis hodder Plijet bras ma oan bet gant Le monde de Buster gant ar memes skrivagner, n'on ket bet evit chom hep kemer hennezh el levraoueg. N'eo ket daou levr disheñvel mat e gwirionez, o vezañ m'o deus Buster hag Hodder ar memes temz-spered, ha n'eo ket unan boutin. O daou e vevont un tammig e-kichen ar re all hep bezañ anavezet ganto penn-da-benn, ha ne vag nag an eil nag egile an disterañ c'hwervoni ouzh ar re o lak a-gostez. Kenkoulz lavaret n'eo ket gwall realist al levr-mañ, ha koulskoude... daoust ma ne rafe ket kalz a ziforc'h Hodder etre ar vuhez war hun hag an hini war zihun ez eus ur bern munudoù o tiskouez gwirionded an dud hag an traoù tro-dro dezhañ : emzalc'h e dad e-keñver ar sorbiennoù a enroll an tad-kozh...
Pinvidik e kavan e dudennoù a eil renk : gouzout a ra chom hep reiñ alc'hwez o zemz-spered diouzhtu : tudenn Filip amañ da skouer. Mont a ra un disterig re bell a-wezhioù, kuit da leuskel al lenner da grediñ emañ o lenn traoù gwir... arabat disoñjal eo un arvest, traoù marzhus, arabat kouezhañ e pej ar wirionez rik !
Plijus eo kavanded Hodder hag an holl dudennoù diheñchet tamm-pe-damm a vev tro-dro dezhañ, kontet eo gant kalz a varzhoniezh ha gant fent ivez. N'em eus ket kavet gwall zedennus an arguzenn, istor ar voudig, met ne vern, bed Bjarne Reuter dre vras a gavan marzhus ha dibar. N'on ket souezhet en dije gounezet ur bern prizioù lennegel evit e oberennoù evit ar yaouankiz.

Comments

]]> Tue, 01 Dec 2009 13:51:20 +0100 Soner, Yann Meur, Frañs (2002) http://alenn.nireblog.com/post/2009/11/23/soner-yann-meur-frans-2002 http://alenn.nireblog.com/post/2009/11/23/soner-yann-meur-frans-2002 Soner

Petra eo al levr-mañ ma n'eo ket un dastumad eñvorennoù kreizennet war ar vicher ? En e blas e vije bet e-kichen d'an hini 'meus lennet n'eus ket pell 'zo e dastumad "Ar vicher ha Breizh" krouet gant Al Liamm. N'eo ket bet skrivet war-eeun e brezhoneg, avat, daoust ma vije kaoz alies eus ar brezhoneg e-barzh, o vezañ m'eo brezhoneger an aozer ha tomm ouzh ar yezh... komzet nemetken ? ...bet eo Stefan Moal oc'h en em silañ en e groc'hen, hag e tisoñjer eo bet troet al levr gant an naturel ma teu e droidigezh. Labour brav tre.
Skoet on bet gant taolenn al levr er penn kentañ anezhañ : aozet mat eo, gant titloù harmonizet etrezo, hag ur c'hromm oc'h heuliañ ur soñj resis, un diorren bennak : gant ar gwir labour a skrivagner-se 'oan engortoz ag un oberenn lennegeloc'h. N'eo ket skrivet fall met ne ra nemet heuliañ red an amzer evel n'eus forzh peseurt dastumad eñvorennoù. Plijus kenañ eo da lenn daoust ma ne vije ket kalz traoù nevez da zeskiñ evit unan a anavez ar metoù-se tamm-pe-damm dija. Kavet 'n eus din e skrive kalzig war un ton diskouez, evel pa vije c'hoazh war al leurenn : chom a ra a-ziavaez en ur ober van da vezañ "soñjet" : e gwirionez ne ra nemet implijout klichedoù diwar-benn an idantelezh ha gwiskañ ar groc'hen-soner a ijiner e oar gwiskañ. N'eus forzh, lennet vez aes, c'hoarzhet 'vez, hag anavezet tud 'zo e-ser tremen. N'eus ket ezhomm muioc'h evit tremen ur prantad-lenn plijus.

Comments

]]> Mon, 23 Nov 2009 09:21:10 +0100 Hospitalo sepetaĝa, Walter Klag, Aostria (1990-1991) http://alenn.nireblog.com/post/2009/11/20/hospitalo-sepetaga-walter-klag-aostria-1990-1991 http://alenn.nireblog.com/post/2009/11/20/hospitalo-sepetaga-walter-klag-aostria-1990-1991 En esperanteg eo al levr-mañ. Talvezout a ra e ditl "An ospital e seizh estaj". Un danevell eo e gwirionez, skrivet en un doare dieub gant an aozer diwar danevell Dino Buzatti Sette Piani, a zo en italianeg el levrig divyezhek (n'em eus ket gellet profitañ eus an divyezhegez-se evit kompren gwelloc'h o vezañ ma ne gomzan ket italianeg, gwelet 'm eus memestra e oa pell testenn orin Sette Piani eus hini Walter Klag).
20 pennadig, berr-kenañ a-wezhioù, a ya d'ober an danevell. Skrivet eo en un doare eeun, gant ur geriaoueg diazez hag ur bern divizoù. Skrivet brav eo dre vras, nemet er fin ma klask Walter Klag, div wezh, fourrañ en e destenn fedoù gwir diwar-benn muntrerien ez eus bet anezho : terriñ a ra al lusk, a-fed istor met ivez a-fed skritur peogwir eo kalz hiroc'h ha diaesoc'h da lenn ar pennadoù-se.
Plijus eo mennozh an danevell (mennozh Dino Buzzati eta) : un den a ya da vezañ soagnet en ur glinikenn. Dre ma n'eo ket grevus e gleñved e loj e seizhvet estaj ar savadur. Seul glañvoc'h, seul izeloc'h, setu reolenn an ti ! Lakaet e vez da ziskenn tamm ha tamm evel ma c'heller soñjal... E rez-an-douar e varver.
Ne oa ket diaes da lenn, graet 'm eus div wezh memestra, an eil gwezh gant ur geriadur evit gwiriañ n'em boa ket treuzkomprenet traoù 'zo.
Tro 'm eus bet da soñjal, en ur lenn an danevell-mañ, n'eus ket da gaout mezh rak ar pezh a vez embannet e brezhoneg. En desped d'e sioù e ya pep skrid, en ur yezh "vihan", da binvidikaat ar bern...

Comments

]]> Fri, 20 Nov 2009 09:05:41 +0100 L'invitée, Simone de Beauvoir, Frañs (1943) http://alenn.nireblog.com/post/2009/11/19/linvitee-simone-de-beauvoir-frans-1943 http://alenn.nireblog.com/post/2009/11/19/linvitee-simone-de-beauvoir-frans-1943 L'invitée
Iskis kenañ e oa al levr-mañ da lenn ha sebezet on chomet pa m'eus bet serret anezhañ, o vezañ ma ne ouien tamm ebet eus petra e kaozee e gwirionez. Kinnig a ra ar skrivagnerez ur c'houblad karantezus, met dieub, a ziskouez kaout un emzalc'h modern-kenañ (skiant-faltaziek zoken bremañ m'omp aet war-gil a-fed moral abaoe ar bloavezhioù 70...) : e mod-se e c'hell pep hini mont da welet tu pe du, bevañ un avañtur bennak, ha distreiñ d'e gile da gontañ dezhañ troioù-distroioù e galon. Met pa ya an avañtur da sirius evit unan pe egile e vrañsell kempouez ar garantez hag e lak anezhi en arvar. Kement-se o tremen just a-raok an eil brezel-bed : ur ral eo lenn seurt skridoù diwar-benn ar prantad-mañ eus an Istor. Koulskoude e santer, en doare m'eo skrivet, en deus koshaet al levr a-fed foñs un disterig. Deskrivet eo munut-munut an disterañ soñj a dreuz empenn an tri fenndudenn hanter (un triad, e kreiz ar jeu, ha Gerbert da lakaat traoù 'zo er gouloù), ken munut ma chomen alvaonet o soñjal el labour ijinañ hag e resisded karakter pep tudenn.
En em laosket on da vont gant red an darvoudoù, pe an nann-darvoudoù kentoc'h, ha kavet mat a-benn ar fin met iskis kenañ, netra da welet gant ar romantoù amerikan a lennan diouzh boaz, dibosubl din deskrivañ gant gerioù eeun eus petra oa kaoz. Plijet on bet dre vras daoust m'em eus kavet hirig al levr un tamm... ha n'eo nemet en ur glask ur skeudenn evit va fennad em eus kavet, e Wikipedia, an alc'hwez evit kompren ar pezh 'moa lennet.
N'eo ket "L'invitée" ur gwir romant : deskrivet e vez ennañ an darempred a oa etre Sartre, Simone de Beauvoir hag Olga. Krog e oa ar skrivagnerez da sevel en he romant he soñjezon a brederouriez evit ar pezh a sell ouzh kann an emskiantoù etrezo hag ouzh posublted, pe get, ar c'hemm-ouzh-kemm. [L'Invitée est publié en 1943. Elle y décrit, à travers des personnages imaginaires, la relation entre Sartre, Olga et elle-même, tout en élaborant sa réflexion philosophique concernent la lutte entre les consciences et les possibilités de la réciprocité.]

Ne blij ket re din gouzout re a draoù diwar-benn al levrioù emaon o vont da lenn, met santout a ran 'mije tennet muioc'h eus va lennadenn pa 'mije gouezet kement-se a-raok. N'eus forzh, talvezout a rae ar boan memestra, ha savet ennon c'hoant bras da c'houzout muioc'h diwar-benn Simone de Beauvoir a oa, war a welan, ur plac'h a-benn ! (hag "a benn"...)

Comments

]]> Thu, 19 Nov 2009 23:08:04 +0100 Evel-se e oamp, Herve Herri (1982) http://alenn.nireblog.com/post/2009/11/12/evel-se-e-oamp-herve-herri-1982 http://alenn.nireblog.com/post/2009/11/12/evel-se-e-oamp-herve-herri-1982 Evel-se e oamp
Emañ al levr etre an dastumad eñvorennoù hag an danevelloù, o vezañ ma kont ar skrivagner buhez tud all egetañ a-wezhioù. Ar santimant 'm eus bet memestra da lenn e vuhez, daoust ma vije kreizennet an eñvorennoù war tem e labour a vouler. Aes eo da lenn, skrivet en ur brezhoneg lennek "klasel" ma c'heller lavaret, kuit a droiennoù lec'hel met gant ur geriaoueg resis ha spis. Plijadur em eus bet o lenn al levr-mañ peogwir e skeudenn mat tre Breizh an XXvet kantved (penn-da-benn, kazi) er gêrioù. Kalzig a fent zo el levr ivez, mousc'hoarzhet e vez, c'hoarzhet a-wezhioù ! Ur spered didrabas a ziskouez kaout ar skrivagner, hep bezañ pout, ar pezh a lak flour al lennadenn. Skoet on bet gant an diforc'h a ambiañs war ar prantad-labour gwezhall ha bremañ : diaes eo da empentiñ evidomp !
En desped d'e ditl divlaz ha d'e c'holo diamzeriet eo Evel-se e oamp ul levr bourrus a zesker ur bochad traoù ennañ.

Comments

]]> Thu, 12 Nov 2009 13:27:00 +0100 Dictionnaire des Utopies, Michèle Riot-Sarcey, Thomas Bouchet, Antoine Picon, Frañs (2002) http://alenn.nireblog.com/post/2009/11/05/dictionnaire-des-utopies-michele-riot-sarcey-thomas-bouchet-antoine-picon-frans-2002 http://alenn.nireblog.com/post/2009/11/05/dictionnaire-des-utopies-michele-riot-sarcey-thomas-bouchet-antoine-picon-frans-2002 Dictionnaire des Utopies
Kantreet ha digantreet en deus va ijin rak an titl brokus-mañ a-raok ne c'hellfen tapout krog em lennadenn da vat ! Traoù 'zo 'm boa divinet e vijent e-barzh (More, Fourier, ar yezhoù ijinet...) lod all avat zo bet dic'hortoz-krenn : "la grève générale", "internet", "l'imagerie pastorale dans les opéras", "le somnambulisme" ha meur a hini all...). Urzh al lizherenneg, doujet dre m'emaomp en ur geriadur, zo bet un abeg all da lenn al levr-mañ gant kement a blijadur ha da zegemer ar pennadoù evel kement a souezhadennoù. Ur misi !
Arabat chom gennet war ar pennad-digeriñ, start a-walc'h. Reiñ a ra an ton koulskoude : emaomp war un dachenn skiantel. Sirius ha diellet eo ar bras eus ar pennadoù. Desket 'm eus ur mor a draoù. Ar pennadoù, niverus, o plediñ gant prederouriezh pe teologiezh a vije ret kemer amzer evit o dielfennañ gant ar c'hemplezh m'int evit an amatourez ma z'on : ar geriaoueg arbennig zo enno oa dianav-krenn din a-wezhioù. Kavout a ra din koulskoude e ya an diaestaerioù-se d'ober pinvidigezh al levr-mañ en tu all d'al lennadenn gentañ ; ne ya ket e vouedenn da hesk. Talvoudus e c'hello bezañ kement pennad zo ennañ, implijet evel ma tle bezañ en ur geriadur : diouzh an ezhomm.
Plijet e vo ar vrezhonegerien gant meneg meuleudius Enez ar Rod p.214 moarvat !
261 pennad zo er geriadur-mañ (embannadur 2006) : 261 teñzor bihan, ha 261 dor a zigor war levrioù all 'm eus c'hoant da lenn. Sur on bremañ ne vo ket hir a-walc'h va buhez evit en ober ! Mennet on start da gregiñ gant "La philosophie pour les nuls" koulskoude ;-)

Comments

]]> Thu, 05 Nov 2009 11:08:53 +0100 Fin din skriva e brezhoneg ?, Mikael Madeg (2009) http://alenn.nireblog.com/post/2009/10/28/fin-din-skriva-e-brezhoneg-mikael-madeg-2009 http://alenn.nireblog.com/post/2009/10/28/fin-din-skriva-e-brezhoneg-mikael-madeg-2009 Fin din skriva e brezhoneg

Prenet 'm eus al levr peogwir eo ur stagadenn da "Ur sell a-dreñv war un oberenn", daoust d'ar rentaou-kont flemmus em boa lennet diwar e benn e-barzh "Ya" hag "Al Liamm", ma 'm eus soñj mat, peogwir en em santan bizet war-eeun : bep bloaz ez an da c'houlenn gant ar skrivagner hag-eñ eo bet embannet ur romant bennak nevez gantañ, peogwir e plij din lenn e romantoù dre vras, ha peogwir em eus desket ur bern traoù en ur ober, daoust ma vije anat en e holl skridoù lennegel techoù displijus 'zo (met daoust hag-eñ ne c'heller ket lavaret ar memes tra diwar-benn ar skrivagnerien all, ar re a skriv ouzhpenn ul levr ?). N'on ket a-du gant ar burutelladennoù : me gav din ez eus ur bern traoù gwir el levr-mañ. Abegoù zo da baranoia Mikael Madeg ; n'eo ket ur skrivagner doujet, na karet, gant ar vrezhonegerien, abalamour d'e bersonelezh a gredan, d'e berzhioù kasaüs o kregiñ gant "em..." : emgarantez,... Un emzalc'h bugel eo a-berzh ar vrezhonegerien (ne zeuont ket da vezañ e lennerien dre se) dreist-holl pa weler nag a voued a zo en e levrioù. Ne c'hellan ket muzuliañ ar pezh 'n eus degaset din a-fed brezhoneg, dija, hep kontañ ar sevenadur, ar blijadur da heuliañ e harozed hag ur vousfent soutil ral.
Krediñ a ra listennañ 39 abeg da baouez skrivañ romantoù a-raok lavaret e raio memestra ma peg ennañ, pezh a souetan. Mat eo e vije skrivet du war wenn seurt siliennoù n'int ket aes da bakañ daoust ma vijent damwelet tamm pe damm gant pep hini. Souezhet on bet gant traoù 'zo, da skouer ar fed 'vije feuket gant ar fent vez graet ouzh e bizhoni : alies em eus gwelet anezhañ o c'hoarzhin diwar e goust dezhañ war ar sujed se, war-eeun pe en e levrioù !
Faziañ a ra war ur poent, a gav din : krediñ a reer e vije bet o c'hortoz loreoù evit e oberenn a-hed e vuhez. Koulskoude eo anat din n'eus ket da c'hortoz brud war ur prantad ken berr. M'eo talvoudus e oberenn ne vo gwelet nemet war e lerc'h, ha ne raio nemet kreskiñ gant an amzer. Ne dalv ket kalz tra ar prizioù lennegel, ar pezh a zispleg mat en 10vet kraf, sujed int ouzh ar c'hiz, roet gant tud a rakvarn hervez ar skol-mañ-skol, lakaet tal-ouzh-tal skridoù n'heller ket keñveriañ...
C'hwerv eo soñjezonoù Mikael Madeg gant gwir abeg. Dre zichañs, dont a ra al levrig-mañ just war-lerc'h ur romant mat tre gantañ (sinet Mac Domnhaill). Me gav din eo talvoudus lenn ar pezh en deus da lavaret evit kompren gwelloc'h anezhañ met ivez evit teurel gouloù war bed ar skrivagnerien vrezhoneg : aner, met ret, evit adkemer pozioù Yann-Bêr Piriou...

Comments

]]> Wed, 28 Oct 2009 08:56:15 +0100 Mevelien an urzh 3 - Mestr an tremen, Yann-Fañch Jacq (2009) http://alenn.nireblog.com/post/2009/10/19/mevelien-an-urzh-3-mestr-an-tremen-yann-fanch-jacq-2009 http://alenn.nireblog.com/post/2009/10/19/mevelien-an-urzh-3-mestr-an-tremen-yann-fanch-jacq-2009 Mestr an tremen

Levr diwezhañ an heuliad teir levrenn Mevelien an urzh eo hennezh. Mont a ra mat gant an eil hini, o vezañ ma kendalc'h ar penndudennoù da bourmen en amzer, pezh a ro tro d'al lenner da vevañ fedoù pouezus 'zo eus an Istor.
N'on ket tik gant an itrik daoust ma ne vije ket fall : re a ober 'zo evidon, o lazhañ kement tra all. An tudennoù a anavezer abaoe teir levrenn zo estrañjourien evidomp c'hoazh, ur c'horf o deus, ket a ene. Meneg zo eus karantez, eus mignoniezh, met chom a ra e stad ar gerioù, ne vez ket bevet na gant an tudennoù na gant al lenner. Kregiñ a ra mat tre al levr koulskoude, desachet e vez an evezh diouzhtu, siwazh ne zalc'h ket war an hirder hag e c'heller enoeiñ daoust ma vije strilh war an ober.
Dipitus e kavan ar fin dreist holl, n'eo ket bet gouest ar skrivagner da adpakañ e holl rikoù en e sac'h a-raok mont kuit ; kontrol da se e tigor war tudennoù all c'hoazh... ur fin evit an trede levrenn n'eo ken, ouzhpenn : ret vije bet lakaat an tudennoù da zistreiñ en o metoù orin, pa ne vije nemet dre ar soñj, evit gellout muzuliañ an hent graet.
Ma, n'eo ket displijus da lenn kennebeut, dre m'eo aes hag a-vremañ. Klouar e choman, traken.

Comments

]]> Mon, 19 Oct 2009 11:54:59 +0100 Comment écrire de la fantasy et de la science-fiction, Orson Scott Card, Amerika (1990) http://alenn.nireblog.com/post/2009/10/19/comment-ecrire-de-la-fantasy-et-de-la-science-fiction-orson-scott-card-amerika-1990 http://alenn.nireblog.com/post/2009/10/19/comment-ecrire-de-la-fantasy-et-de-la-science-fiction-orson-scott-card-amerika-1990 Comment écrireDiaes 'vije bet din chom diseblant dirak al levr-mañ, skrivet gant unan eus ar skrivagnerien em eus ar brasañ doujañs evito, gant ar pell e vezer kaset gant e ijinadennoù.
Unan eus gwellañ perzhioù al levr-mañ eo stil Orson Scott Card : ha pa vije en ul levr n'eus istor ebet ennañ e chom plijus tre da lenn, dont a ra a-benn ar skrivagner da fourrañ ur bern istorigoù diwar-benn e vuhez ha geneliezh e romantoù, ha da implijout ur bern skouerioù a-hend-all, tennet eus al lennegezh emañ o kaozeal diwar he fenn. En ul lec'h bennak e lak anezhañ e-unan da farouell o klask gwerzhañ un dra bennak d'an dremenidi war ar marc'had, ha gwir eo e c'hell e don tostaat eus se a-wezhioù, gant ar sklaer hag eeun m'eo e lavar, met dreist pep tra eo ar santimant a chom hini ul lennadenn blijus ha didaktik.
N'on ket sur e vije un hentenn beurvat evit en em lakaat da skrivañ avat, daoust ma n'em bije netra da rebech ouzh ar c'huzulioù a ro : ar fed e vijent kontet kentoc'h eget listennet a lak diaes an implij anezho. Kalz a guzulioù damheñvel kinniget en un doare berroc'h em eus kavet n'eus ket pell 'zo war lec'hienn ar gazetenn Solaris. E levr Orson Scott Card n'em eus ket kavet dedennus, kennebeut, ar c'huzulioù o tennañ d'ar c'hempouez etre ar vuhez familh hag al labour skrivañ, pe an alioù leun a furnez (met ken anat...) diwar-benn merañ an arc'hant a zeu diwar al labour graet (marteze eo ivez dre ma ne c'hell ket dedennañ seurt traoù skrivagner brezhoneg ebet...). Plijout a ra din, koulskoude, keñveriañ sevenadur ar Stadoù-Unanet gant hon hini.
Desket e vez a bep seurt, diwar-benn ar soñjoù, an itrik, an tudennoù hag o fsikologiezh (daoust ma ne vije ket ken aes hag ar pezh a ziskouez, eñ hag en deus ar stek evit se !), ar savboent... d'am c'hentañ lennadenn em boa kavet un tammig enoeüs ar pajennoù niverus diwar-benn an diforc'h etre skiant-faltazi ha moliac'h, met a-benn ar fin e kav din e teuont a-reizh, talvoudus eo gouzout ar pezh emaer oc'h ober ! Alies e chomen etre daou e oberennoù Orson Scott Card hag a dremen en ur bed a seblant bezañ krennamzerel da gentañ (un tammig evel en Enez ar Vertuz Youenn Olier).
Dedennus kenañ e kavan al levr-mañ gant Orson Scott Card evit kompren gwelloc'h an oberennoù skiant-faltazi pe moliac'h a blij din kement, intrañ un tammig muioc'h huderezh al levrioù-beajiñ-meur-se. Lennet e vez levr didaktik Orson Scott Card meur a wezh, digudenn, gant an niver a draoù dedennus a zo e-barzh. Talvezout a ra ar boan e brenañ.

Comments

]]> Mon, 19 Oct 2009 11:29:54 +0100